歐聯：摩納哥搶分出線做大事_東方日報

歐聯早場摩納哥對阿士東維拉。兩隊都目標明確，就係希望喺最後兩輪盡搶，攞到前8位置，直接殺入16強，摩納哥雖然近期成績一般，但主場作賽點都會力求入波搶分，而且球隊今季6場歐聯，5次開3球或以上，維拉入球能力亦強，今場肯定係入球騷，推介2.5球入球大。

（Now 643周三凌晨1時45分直播）文:渡邊年

阿士東維拉現時6戰得13分高踞第5位，賽程剩餘今場作客摩納哥及下輪主場對些路迪，摩納哥排第16位，但其實只係少維拉3分，最後兩輪對手係維拉及作客國際米蘭，兩場均為硬仗，兩隊都有機會最終攞到前8，唔理得咁多，今場搶得就搶。

論近況，摩納哥確係差啲啲，各項賽事最近4場90分鐘未贏過，只得2和2負，不過佢哋入球能力始終唔差，法甲18戰入29球、歐聯6戰入12球，5次開2球或以上，而且佢哋喺主場作賽，踢得特別開放，各項賽事近4次主場，3次開4球或以上。

屈堅斯挑戰艾邦拉荷紀錄
阿士東維拉同樣擁有不俗火力，英超22戰入33球、歐聯6戰有9球，球隊喺歐戰經驗豐富嘅領隊艾美利帶領下，造出4勝1和成績，球隊日前英超作客阿仙奴，落後2球嘅劣勢下力追至2比2，鬥志十足。奧尼屈堅斯頂入逼和關鍵入波，呢名英格蘭前鋒累積喺英超入咗69球，下個目標係打破艾邦拉荷喺維拉嘅英超74球入球紀錄，雖然今場係歐聯，但當弗之下入波個勢唔好畀佢停，相信屈堅斯都會爭取入波，為維拉創造佳績，入球大值得支持。