英超：葉士域治撼白禮頓和味濃_東方日報

另一場早少少開波嘅英超，葉士域治主場硬撼白禮頓。葉士域治近3場未輸過相當硬淨，「和平大使」白禮頓亦連續4場聯賽打和，今場勢均力敵，不妨直取和波。（Now 622周五凌晨3時30分直播）文:法達斯維

葉士域治今季升上英超後，雖然長期喺下游徘徊，但多場聯賽都係僅敗，可見佢哋以體力拚勁同列強周旋唔輸蝕，上年除夕更爆冷砌低車路士，唔單止係今季聯賽首次主場贏波，亦係佢哋23年來首場英超主場勝仗，之後作客兩度領先下被富咸臨尾逼和，日前英足盃輕鬆派布里斯托流浪3蛋，近3場取得2勝1和，信心返晒嚟，呢類細球會士氣大過天，道氣未洩千祈咪睇小。

「海鷗」聯賽50%和波率
另邊廂，白禮頓睇戰績同樣硬淨，今季20輪聯賽只輸過4場，強如阿仙奴及曼城都贏唔到佢哋，不過「海鷗」遇強愈強、遇弱愈弱，對住狼隊及修咸頓等弱旅竟然贏唔到，今季20輪聯賽和咗10場，單計近4輪更全部打和，實在冇本錢讓波。翻查紀錄，雙方近3次交手同樣和波收場，包括首循環互交白卷，今場隨時又一團和氣。