英足盃：阿仙奴對曼聯等睇加時_東方日報

今晚英足盃爆發「仙魔戰」，阿仙奴主場硬撼曼聯。累計捧走英足盃次數最多球隊嘅「兵工廠」，同衞冕嘅曼聯交鋒，話題十足，加上英足盃賽場一場過冇仇報，今場必定鬥得難分難解。文:謝德謙

阿仙奴近況略見回落，先於聯賽作客1比1打和白禮頓，繼而英聯盃首回合0比2不敵紐卡素，主帥阿迪達賽後批評比賽用個波令球隊輸波，相信佢近期壓力都唔細。「兵工廠」今晚面對宿敵，相信前線繼續倚重夏維斯、李安度杜沙特及加比爾馬天尼利呢個進攻組合，務求重溫上月聯賽交手以2比0擊敗「紅魔」嘅好夢。

紅魔要嚴防死球
曼聯上周聯賽大踢爭氣波，作客2比2打和利物浦，令唔少球迷跌眼鏡，若然唔係哈利馬古尼完場前錯失良機，更有可能袋晒3分。主帥魯賓艾摩廉深知球隊今季目標放喺盃賽身上，今場必定落足柯打，叫球員「波到人到」，以免畀對手太多空位。新星阿密特迪亞路剛續約加薪，相信今場亦會大踢「身價波」。此外艾摩廉亦要特別留意阿仙奴嘅死球戰術，叫球員做好死球防守，比賽大有機會陷入拉鋸，要鍊到加時絕不出奇。