蘇超：國家打吡賀新年 格流些路迪蓄細待發_東方日報

蘇超新一年即有「國家打吡」上演，格拉斯哥流浪主場迎戰些路迪。「1哥」些路迪喺蘇格蘭大超班，目前仍保持不敗之身，而且積分上領先格拉斯哥流浪14分，今場作客只要不敗亦冇壞，必定穩陣為先，中位數2.5球入球細捧得過。（周四晚11時開賽）文:工廠仔

些路迪喺蘇超遙遙領先，捧走冠軍只係時間問題，雖然佢哋實力超群，不過死敵格拉斯哥流浪每次交鋒都會特別肉緊；兩星期前蘇聯盃決賽，些路迪就要踢到互射12碼先至贏波捧盃，今場些路迪作客想贏都唔係咁容易。

「舒米仔」9個鐘冇失波
事實上，些路迪嘅成功建基於超誇張嘅堅固防守，佢哋今季18場聯賽只係失過4球，門神「舒米仔」卡斯柏舒米高已經超過9個鐘頭上陣時間冇失波，領隊羅渣士領軍經驗豐富，知道今場就算和波都係滿意嘅結果，當然會優先發揮最強嘅防守戰術。

格拉斯哥流浪近7次對些路迪未贏過，今仗當然唔敢輕率搶攻，而且佢哋近期喺主場踢法甚為保守，對上5場主場有4場總入球開2球或以下，「國家打吡」兩隊都以唔輸為大前提，博入球細最好路。